2023·03·16
Mendaroko Udalak Intxarbakutzako aldapa berrituko du 2023ko bigarren seihilekoan
- Obrak honetan datza: zirkulazioaren noranzko bakarra utziko da biribilgunetik goranzko noranzkoan, eta espaloi bat sortuko da eskuinaldean. Uren kanalizazioa eta argiztapena ere berrituko dira.
- Iñaki Arregui, alkatea: “Inguru hau modernizatuko dugu oinezkoentzat atseginagoa eginez, ibilgailuen zirkulazioa hobetuz eta aisialdirako eta paseorako gune seguruagoa eta irisgarriagoa sortuz”.
Mendaroko Udalak Intxarbakutzako aldapa berrituko du Azpilgoeta auzoan, biribilgunetik Chocolates Mendaro eraikina dagoen altuerainoko tartean. Obra apirilean lizitatzea aurreikusten du, eta ekainean hastea. Proiektua Iñaki Arregui alkateak eta Nerea Isasi zinegotziak aurkeztu dute.
Obra honetan, zirkulazioaren noranzko bakarra utziko da biribilgunetik goranzko noranzkoan (gaur egun, birmoldatu beharreko kaleak bi noranzkoko zirkulazioa du), eta espaloi bat egingo da eskuinaldean, oinezkoek erabil dezaten, puntu horretako irisgarritasuna hobetzeko. Uren kanalizazioa eta argiztapena ere berrituko dira, eta LED teknologiakoa izango da aurrerantzean, jasangarriagoa. Horrez gain, harrizko horma kendu eta baranda ezarriko da.
Alkateak adierazi du “2023ko ekitaldian inbertsiorik handiena izango duen obra da. Proiektu horretan 2022tik ari gara lanean, eta Azpilgoetako bizilagunen egunerokotasuna nabarmen hobetuko du. Inguru hau modernizatuko dugu oinezkoentzat atseginagoa izan dadin, ibilgailuen zirkulazioa hobetuz eta aisialdirako eta paseorako gune seguruagoa eta irisgarriagoa sortuz”.
Alde batetik, ibilgailuentzako bidearen ardatz berria dago, geometriari, proiektu-abiadurari eta abarri dagokienez hobetu nahi dena. Bestetik, Azpilgoeta kalea hiri-integratu nahi da, ibilgailuentzako galtzada eta oinezkoentzako espaloia hobetuz. Ibilgailuen zirkulazioa ahalbidetuko duen bide-zabalerari eusteko ahalegina egin da, baina espaloiaren zabalera ez da inoiz bi metrotik beherako balioan mugatzen, urbanizatu beharreko eremu osoan irisgarritasun-parametroak betez.
Azpilgoeta kalea berrurbanizatzeko, dauden farolak kendu, biltegiratu eta mastak berriz jartzeko asmoa dago, LED argiak dituen luminaria berri bat jarriz. Ur-bilketaren kanalizazioa ere berrantolatuko da, eta bankuak eta paperontziak ezarriko dira.
Hasierako aurrekontua 232.885,65 €-koa da (BEZa barne), eta urbanizatzeko obretarako aurreikusitako exekuzio-epea 6 astekoa da.
